قصة العنكبوت

[محمد صفوق]

ياطير ياللي زرعت الورد بعيون نوت= وش فيك تبحث لقلبك عن شواطي نجاة
أخاف قلبك تقسّيه السنين ويموت = وتْصير تربتْك ماتقبل بذور النبات
من يوم بطّلت تطري قصة العنكبوت= وانا اتحرّاك تركب صهوة العاديات
فجأة تغيّرْت وأحرقت بحياتك كروت=بشّر !؟عسى ما احترق كرتي بنارك ومات؟
أقفيت مع زحمة الدنيا وسحر البشوت= وصاحبْك متعلق ٍ باطراف كمّ العباة
لو تدري إنك بقلبي تمرض ولاتموت= ماجيت تشره على سهوي بركعة صلاة
يمكن بلعني –وانا في غفلة احساس- حوت !!= لكنك أغلى ،وأنا مالي بغيرك غناة
وان غيّبتني تصاريف اختلاف الوقوت=لابد ما ينتمي لك هاجس الذكريات
ولو اني اقدع من خْلاص الحسا والنبوت= من (حلوة الجوف) شايل للزمان اتْمرات
لاصرت عندي تْعادل بالرخا ألف صوت= تراك بالضيق والشدّة تْساوي حياة
دونك تصير الليال بنكهة العنزروت= وأمرّ الأيام يعطيها حضورك حلاة
إن غاب صوتك شعرت إني ورا حضرمـوت = وارباع قلبي مـن اسبـاب الهنـا خاليـات
صدّقني اني بعض مرات اسبّ البْخوت= وليا ذكرتك ليا حظي يقصّ الصّفاة
محظوظ لنّي على بحرك ملكت اليخوت= وابحرت من ياس حرفي لاجمل الأغنيات
كنت اكتب البيت واقراه بعيونك بيوت = لااعجبك شعري تجاهلت أجمل المعجبات
وكنت اقرب الناس من صدقي قبل لا تفوت= الفرصة اللي تجّمعني عقب هالشتات
ياطير وش عاد اقول ولابقى اللي السكوت= والفكر ماعاد ينجب بالمعاني بنات