كثر ماغاب عن عيني حبيب وغالي واصحـاب=تمسّكت بطرف آخـر سوالفهـم ويطرالـي ..
تعاليـل المسـاء لا جمعتّنـا والسمـر بـواب=وحكاوي امي العذبـه وضحكتهـا مـع عيالـي
اسج وخاطري مثل السجين اليا غشـاه عتـاب=يصحي كل غفوات الحنيـن ويحتـري غالـي
ذبحني هالحزن كنّه يطير ولـه جنـاح عقـاب=تعلّق في مخاليبـه عزيـز وحـزْ فـي بالـي
تسولف لي عيونك يا حليمة عن عيون احبـاب=نسوا قبل الفراق دموعهـم فـي كمـي البالـي
تمر وجيههم مثل السحاب الموحـش المرتـاب=وامرْ وجيههم مثـل الكريـم ليـا غـدا خالـي
حليمة وش كتب هذا الحنيـن الموجـع اللّهـاب=على اوراق السنين الجاعفـات اللـي تورّالـي
حليمة/ يا حليمة/ ياحليمـة/ والعـذاب اسـراب=يوقّـع بالحنايـا والهـديـل الـمُـر مـوالـي
منازلهـم حزينـة والدرايـش تشتكـي للبـاب=من رياح الفراق اليا عوت من مرقـبٍ عالـي
رجيتك يالبعاد اللي تهيجـن والحـزن عـرّاب=امانه قدّنـي لأقـرب طريـق وخلنـي لحالـي
خطفني منّهم هذا الغياب اللـي يعـوج ارقـاب=سرقني من بيادرهـم هجيـر وشـحْ بظلالـي
حلمت البارحه بـامي (ويدين امي تسيل خضاب=من دموعي).. والوذ بطيفها مـن قلّـة الوالـي
صحيت ولا بقى بيدي من ايديها سـوى عنّـاب=كأن عيونها تنْده تعـال اجلـس علـى جالـي
حليمة يا حليمة وال/جروح اكبر مـن الجلبـاب=من البارح وهي تثعى وانـا احسبهـا تحلوالـي
(حليمـه اننـا نبقـى علـى أعتابهـا أغْـراب=ونعزِف مِـن مآقينـا مآقـي تُبكـي السالـي )
تعبنا كم لنا نرجي على صدور السمـا غيّـاب=نفضفض والرجا يحكي عن اللي ذكرهم غالـي
حليمه لا غدت كل الجهات الاربع ابـلا بـاب=انا من وين اوجه يا حليمه والخلا خالي !!!؟؟؟