نور مشكاه

[محمد الحارثي]

يافرحتي بالشعر في يوم لقياه
أشرح له أوضاعي وأبعطيه عذري
:
وأنحر له أجمل حرف واللي تمناه
واعز قدره مثل ما عز قدري ..!!
:
وأنا الذي واصل بي الحزن لاقصاه
وإن جيت أبفرح ردني يم قبري
:
وحيد في دربٍ طويلٍ ببمشاه
ماشي ولكن التعب هد ظهري !!
:
كم لي أفتش عن وجودي ولاالقاه
أحمل ملامح غربتي وسط صدري
:
سنين ياطيشي وأنا في معاناه
ضيعتني / مني / وضيعت / عمري !
:
في همهمات الريح قررت أبرقاه
وأصعد عروشه قبل مالوقت يجري ,,!
:
من شدة الدهشة بتفغر له أفواه
وتغص به بعض الحناجر وتسري ..!
:
جيت أقطع الظلما معي نور مشكاه
تمحي الظلام وتكتب بحبر سري !
:
وإن ما كتبت وصارت الناس تقراه
أكتب عزاي من أول القاف بدري ..!
:
يوم إن غيري يرتضي فيه بادناه
كفرت بالأدنى من أيام صغري ..!
:
كلام عادي .. ظلمة الفكر تغشاه
ياصبر من يسمع وياصبر صبري
:
وإن جيت أقول الصدق والصدق منجاه
أكثر قصيد اليوم ما عاد يغري