... وتـبـخّر الغليــون !!

[فيصل بن عسكر المهلكي]

وين رايح ؟ .. / .. وين رايح .. ياسديم الارض ؟
وين رايح للشقا ؟ ..
لاتنكفي بالعرْض ..!
.. / .. لين دمعك يستطيل في تفاريق اللقا !
والارض ياصبرك عليها .. / .. ماتبيك ولاتبيها
اخترق ضلعك وموت .. وعاهده .. لاتموت فيها .. !
شقّقت فوقك غمام .. احتاج شربة موجعه .. !
وامطر وطاحت من يده ..
دمعه على كلّ الشقوق ..! وعيّت تبعده ..
كلّ هـ الدنيا عقوق .. والله انْ هـ الدنيا تعوق
واحوالها منّا وفينا .. !
بسّ حنّا .. ماعلينا .. / .. لو يجوع الكون .. نبقى ....
وين نبقى ؟
في البيوت مشرّدين ..
وكلّ شارع ينتصف ..؟
ياخذك بـ اثر الشوف .. عين .. !
... ولو ظميت من المواجع .. / ..
ماظما قلبك ظروف
جوع شبْع / وجوع جايع .. / ..
والمجاعه .. ماتروف !
ياااااا : آهـتـه .. خُفّي عليه ....
بيموت هو .. لاتحتريه !
بياخذ بثاره
شوّي .. شوّي .. شوّي
لين انّه يموت .. !
ويطيح من عينه وجع
لو كان في صبره ... صبور .. !
.. والنور : يبقى لو بدالك في آخره [ حفنة ظلام ] !
مادام جوّك .. ماصفالك ../ ..
قوم اندفن تحت الزحام ..!
واصرخ ... وحاول .. لاتصيح !
في صوتك الجاهر .. فحيح ..
لاتْروح .. من قبل الوداع
جول بشوارع خاطرك
واقرا على الدنيا السلام .... !
!!
!

[فيصل بن عسكر المهلكي]

ياسراجها اللّي بـ سقف الليل مستلقي
................. من يوم طرّف سوادك .. / .. طالبك : بـ اسري !

لـ احلامي المُترفه , والملح في حلقي
................. في غير دار التعب .. / .. ماينعرف قدْري

جيت المدائن وراس البرْد به .. فلقي
................. وحطبت ضلع المواجع .. / .. وانكسر ظهري !!

ماجاني الباب والبوّاب .. في غلقي
................. محتاج قلبٍ يشيل الهمّ .. / .. مايطري

ماعند قومية النورس .. / .. وجه طَلْقي
................. لو كان كلّ الظروف مواتيه صدري

ماعاد يمدي البحر لو هو شهد خَلْقي
................. نورسني اعوام لين انه قضى عمري

ياما مشيت الدروب الممحله .. زلقي
................. لو امرح البال في جفن السهر .. بدري

ياطاغيه بالشجن : لاتضيّقي خِلقي
................. لاناموا الناس .. / .. طغيانك دخل قصري !

القي عنادك .. / .. قبل عصا الزمن ( تلقي
................. سحر المفارق ) وتلقف وصلك المزري !

[فيصل بن عسكر المهلكي]

..... ومعك تسافر الاطلال ... للريح .. للـموّال !
وتجتاح الاتربه ذكراك ..
ويقوم من الزمن رجّال !!
وانا البارح معك باقي ..
مع اوراقي .. وَفِيْ مازلت ..
افيق من الليالي الباقيه .. في عامي المخمور !
بعد ماوصلت ... عند اصغر طموح الوادي الممطور ..!
تثيقلْت ... اعشب بروحي
رغم نوض البال بيديّه .. / ..
نده في الطور .. والساعه تروح مسافرهـ .. جيّه !!
ولاجاء في الزمن واحد .. / ..
ولاواحد يقول : ارتاح ..!
ترى من راح مايرجع .. / .. ولو يسجع حمام البور !
هي الدنيا كذا .. تاخذك معها .. بالعطا .. / .. تقتير
تقوم لـظلّها بكّير .. / ..
لـ ابطت بالوعد .. هـ الشمس .. !
ياسلمى :
مارقدت من امْس !
وعيوني شوّي .. / .. وتطير !
رجعت بماضي عيونك
.. وليل عيونك الحاضر ..!
على درب الظنون .. اشوف باكر .. في مدامعها !
وحارهـ تفتقد معها .. / ..
بساطة حلمها الاصعب .. !
وجدران .. / .. وانارهـ .. / .. وشارع ماعليه اسفلت .. / ..
واماني جارفه .. / .. وقلوب ولْفه .. / .. وانبعاث احلام .. / ..
ياسلمى :
مابقت احلام تغرينا عشان ننام !
مادام اللّي بقى : نود .. / .. وبقايا من دريشة بيت .. !
عثت فيها النفود .. / ..
اللي يماطل طيشها .. الترتيب !
بديت اغيب ..
لين اغيب لين اغيب لين اغيب
واذا غبت انشد الدنيا
واروح .. اتعب مثل ماجيت .. !!
ياسلمى .. هزّني التنهيد
وجرّح مهجتي شوفك ..
ليالي العيد .. وين العيد ؟ في قلب الخلي المشتاق
فهقت العيد
مابانت .. عصاري موتة ظروفك !!
متى اشوفك ؟
متى اشوفك ؟
متى اشوفك ؟

[فيصل بن عسكر المهلكي]

بالله وش عُذر الكِبَرْ لامـن كُبَر .. فرق السنين ؟
.................. لاصار خَدْش مرايتك .. يكبَر تحت مَـلْمَـس يدِك !

ماشفت وجهك في عيون احبابك .. المتْـغـرّبين
.................. العين تتجَعَّـد وساده .. للسهر في مرْقـدِك !

في واحة احلام الورَق : حبر , ورطَب نِخْل , وطحين
.................. ووجيه تتساقط على ارضٍ .. تحرّى مصـعدِك !

هذا انت ؟ .. مو هذا طموحك .. تنقبر في كلّ حين
.................. لاطحت من حيلك حظيظ .. / .. ولارقـى من يسعـدِك !

صافح غِيابك .. كفّ غيَّابِـك .. وعاد اطول .. يدين !
.................. إشتاق لك من كلّ قلبه شوق .. / .. عجّل بوعدِك !

شيّب على ظَرْف الجليد .. / .. [ بلاد ] تستوطِن حنين
..................قصّيت عُمْرك من طَرَف عُـمْرك .. / .. وهذا موقدِك !

... ودُخَّـان يتململ على رَفّ المنام .. / .. بكلّ حين
.................. ودلال باقصى مدْخنتك .. / .. وركن كان لـ مسجدِك !

واصوات ورعانك .. / .. ونور سراجك .. / .. وجارٍ امين
.................. وامّـك تنادي : ياااااااولدي لاتروح من ليّ بعدِك ؟

ياذاك من هو راح ؟ .. / .. من هو باقيٍ نصفه .. حزين
.................. من خاب تحت الارض ؟ .. / .. من هو قيل له : طاب جهدِك ؟

واللّي قعَـد تحت الحياه .. / .. اذاني من طين وعجين
.................. لابدّ يومٍ صـادرٍ من عـِدّ موتاك... وردِك !!

[فيصل بن عسكر المهلكي]

لاتختفي فـ اوضح معالمك .. بـ غموض
.......... الوقت بعض احيان .. مايشبه الوقت !

يا اعظم حبيبٍ فيه من وجهي .. رضوض
.......... اذا انصدمت ؟ ... انا من اجلك .. تعوّقت

من قبل يطلع في السماء .. للمساء .. نوض
.......... ضيّقت بعض الليل من كلّك ... وضقت !

لمحت في يدينك مطر ... عَـسِّــه الرّوض
.......... مدري فتح طاريك / عيني ... ودنّقت

ياخائضٍ مزْن الطواريق ... مفروض
.......... تثمر على غصن السطر .. لاتسلّقت !

الشوق : طيحة حيل بالحبّ منهوض
.......... وانا كذا مشتاق من يومي [إ] خْلِقـت !

مُـرهـق , وقالوا عنّي الناس : محظوظ !
.......... مرتاح باعينهم , وفي عيني : أُرْهـقْـت !

لاتندهش لاغبت ! .. ماغبت .. بغموض
.......... ريّحْـت من شوقي [ سنه ] .. بسّ ... واشتقت !

[فيصل بن عسكر المهلكي]

يابلادي
والسهر ممحل وطرف السفر مايل
والعمر والاموات
من بينهم وادي !!
وانتي فيك ارواح شتّى .. بلاطايل !
ماتنادي في طريق العمر .. تايه
لو تشتّى مصيَف الصبر بـ عبايه
مو كفايه
نترك ارواح ونسافر
نترك الدنيا ونهاجر
مو كفايه
يهجر الحُلم المضاجع .. منافينا
وامانينا تخطف الحِلم .. المواجع .. من ايدينا !
ثم نغيب .. نغيب
في غيهب التخمين
هو بقى للحين
حملٍ رحم شايل !
ياحسافه دمعنا ..يضحك علينا !
ياموطني لاشاب .. يافع من العايل ؟
والفقر دافع .. قيمة العجز .... والمبدا
فارغ و تملا حاوية صمته .. الدمعه
كلّه كذا .. يندا على جمره السُمعه !
ياموطني حضنك خياراتي .. واحلامي
لاشفت غيري طال
وانا عليك اجدا !
ليه انده ايامي وصوت الرجاء امسى ..
عنده اذن من طين .. تبحر بلامرسى
سكّين .. تزهم وجه للقبله .. مسمّي
من يلتفت يمّي برغم اتجاهاتي
لو ينقطع في امانينا عجين امّي
ويعيش تحت الجمر .. منّي .. انا .. اثنين
واكثر بعد .. منّي بعد ... من مواليفي
من غايتي لاطاح ريش التعب .. مرقى !
واول شقا لاختار فيني نهاياته
مو هي حكاياته .. ولاهي حكاياتي
حكاية التأبين
لانسان ماهو ( انسان )
اللي بقى منّه ( لسان ) وجروح كثار
تهزّ صدر الثار .. ياجرح ( لاتصالح ) !
لو يشرب المالح قتيل الغدر فيني !
قد طال حبل الجرح .. ماعاد يمديني
كل شي .. ينبي عنه شيّ ... ورق حتّه
ريح الصبر والجوع
واشياء من حتّى !!

[فيصل بن عسكر المهلكي]

شقّق جدار الوله صورة العشق التليد
................ كلّ ماطشّ الزمن .. روح غيّابي .. عليّ

امس لفّيت المواني .. وانا ساري بعيد
................ من يدي طارت قصيده على قلبٍ خلي !

من ضحك باكي ؟ ومن يبكي وقلبه سعيد ؟
................ اشتهي موتي غرَق وسط همٍّ ممتلي !

يا اقدم جدار انتظاري .. ترى مابه جديد
................ لاعطيت العمر ( وقتي ) ولاظلّيت .. لي !

مبطي اسافر معك .. في مشاويري .. وحيد
................ نافذه لاطلّ منها .. سحابك ينجلي

ياعذابي ريح الايام صلفه ... تستزيد
................ كلّ خطوه تبتعد .. مقرُبه من مقتلي !

هوّ انا ماجيت من خاطري / خاطر عنيد
................ رحت مهجر للمدينه .. بمنفى منزلي !

آسف ... انْ كاني رحلت وبقى منّي نشيد
................ قلت اغنّي ... دامني في دروبك مبتلي !