الجاهل اللي من حياته ما أستفاد

[محمد بن حليلان]

السلام عليكم ورحمة الله
رسالة لمن اتخذها وسيلة للحسد.. ورشق بني جلدته بكلمات لا تليق به..
أتمنى أن تصل كما هي..

ماهوب جاهل لو جهل ما يجهله=الجاهل اللي من حياته ما أستفاد
لو باع في الدنيا نصيبه أو كله=ماأنت بوكيل آدم على أرضه والبلاد
نفسك غدت ياخوي مثل المكحله=تلمع ولكن في دواخلها السواد
حكمك على كل البشر يامسهله=لكن صعبه تقبل أدنى الإنتقاد
وش حدك الرجال يومٍ تجعله=عرضة لسانٍ تستبيحه بالعناد
الله يحاسب كل عبدٍ بعمله=وإن مت وش ترجي من لسانك حصاد
غير الحشر في النار يوم الزلزله=في يوم لا ينفعك لا مال وعتاد
حاذر ترى شرواك وقته يمهله=يآكل ويشبع ظلم من لحم العباد
والعمر واحد والليالي تصهله=والخلق ما تجهل هدفها والمراد
الرجل عمره مرحله في مرحله=ودايم حياته في صراعات وجهاد
فإن جاك طيب والدماثه منهله=يبقى مع أهل الطيب ذكره في ازدياد
وان جاك خالي من علوم المرجله=محدٍ ذكره وجيته مثل الجماد
المسأله ماهي كلام المسأله=ماودي إن قلبك يغطيه الرماد
والله لو مالي شغل فيك وصله=ماقلت ما في الصدر وأظهرت الوداد
غيرك يقول إمن الكلام وينقله=ولا أنت عاقل وتعرف درب الرشاد
وذاك الذي نزلت فيه المنزله=وأغتبت شخصه دون أدله وإستناد
يحفظك ربي والله يحفظه لهله=خلك بعيدٍ عنه واحسن الإعتقاد
لا تطعنه خلف الظهر ثم تقتله=وإطلب من الله الرضا يوم التناد