عيون الشبابيك

[سالم الزمر]

يا مسْرج عيون الشبابيك للريح=راجي خبر من شفّة الريح غالي
يجمع نجوم الليل رمشك مسابيح=والفكر ينثرها لآلي لآلي
البدر موضي والستاير مراجيح=تهزّها ريح الهبوب الشمالي
يا مشعلٍ صدر العنا بالتباريح=يا منادي الذكرى تعالي تعالي
يا منتظر ميعاد للوجد تجريح=في ناظرك والليل سوّى ظلالي
حتى متى تسهر نجومك مصابيح؟ =ما تعرف أْنْ مْواعَد الريح خالي؟
غِض الجفون اللي بها الشوق تبريح=وارخي الرموش الشاخصه للمعالي
على الأمل غِضْ الجفون المجاريح=يا مسرج عيون السهر لليالي