حنانيــ .. آت !

[عبد العزيز الجرّاح]

يارب فِّي من الحزن فوق ماطيق = مخنوق لين الـدمع فـاض و ذرفـته
يارب عفوك همي أكبر من طويق= يارب تغـفـر كل ذنـب اقـترفـته

[عبد العزيز الجرّاح]

من قصيدة " برد و دفا "

يوم شفت البرد بضلوعك جفا=قلـت اضمـك عن شتا بُعدي و اجيك كل ضلعٍ فيك ينده لي : دفا=كيف ماجيلك واضمك واحتويك؟! واغرس ضلوعك وسط صدري وفا=وأنت تدري مالك بصدري شريك

[عبد العزيز الجرّاح]

خلني للضيق والحزن و عناي=و السهر و الهم و الليل الطويل و الجفا و البرد و الشوق و بكاي =و الشقا و الجرح و الصبر الجميل

[عبد العزيز الجرّاح]

غِبْتي وَقَلْبي كِلْ نَبْضَهْ يِحِبِـكْ =جِيتي وَحِبِكْ وِسْطْ قَلْبي نِبَضْتِهْ

[عبد العزيز الجرّاح]

لو يخون البحر ملحه والنوارس = والطيور يخونها الغصن وليانه والأصايل دوم تكبو بالفوارس= والعزيز يعود ما يلقا مكانه والله أنك سيدي للقلب حارس = عاد لااوصيك في حفظ الأمانه وكان ودك في جنون الحب مارس = نشوة المجنون في روعة جنانه

[عبد العزيز الجرّاح]

يسعد صباحك بالرياحين و الفُل = وردٍ يشابه شي في وجنتينك
يفرق صباحك عن الناس بالكل = الله لو بالصبح لمسة يدينك

[عبد العزيز الجرّاح]

أنتَّ هنا ؟
يـ أول صباحات السنة ؟
من العام ما شفتك هنا .. وش جبت لي وياك ؟
عساه مو حزن و عنا ؟!
يا أول صباحات السنة ..

جيتني في هم واوجاع وألم ؟
حالي ترى أصبح عدم .. ما عاد فيني احتمل ..
يموت حلم و أنهزم ..
محتاج قلبي : للسلام ، للحـياااه ، و للهـنا ..
يـ أول صباحات السنة ..

[عبد العزيز الجرّاح]

ذاب بصباحي سُكرك في مرورك = وصارت تحايا الصبح لجلك قصيده
واودعتها في قلب يعشق حضورك = وانتي نبض هالقلب وانتي وريده

[عبد العزيز الجرّاح]

صباح الأربعاء : 14/ 2 / 2018

يا رب سحابة خير تمطر علينا = تغسل بها أرض الرياض وسماها يا كثرنا اللي لك رفعنا يدينا = يا رب تقبل من عبادك دعاها

[عبد العزيز الجرّاح]

يُمّه ،
ودّي أشرب :
صوتك العذب و أضمّه ..
ودي صوتك شي ملموس
وأشمّه ..
ودي كفّك بين يّديني ..
وأبوسه
والله إنّك بـ آخر أعماقي
مغروسة ..
وألف لا باس و طهور
انتي جنّة .. وانتي نور ..

الله لا يحرمنا منّك ،
وإيه لا يحرمك منّا ..