هو عذابك من بقايا قوم "عاد" ؟!

[ثامر بن عبد الله الأسمري]

السلام عليكم ورحمة الله وبركاته
أسعد الله صباحكم الذي يتنفسكم شعرا ً ، ويتلوكم ذكرا ً .
أعتذر عن الغياب بسبب الاختبارات والحمد لله مرت علينا بردا ً وسلاما ً .
وهذه قصيدة جادت بها القريحة عقب الاختبارات وربما تولد الأبيات من رحم المعاناة .

لا أبو الفرقى على جد البعاد = وردوني حوض كل وارده
في خفوقك جيش من زمرة "نجاد" = يقمع بقلبي مشاعر مارده
هو غيابك نيزكٍ يرمي الفؤاد ؟! =أو حضورك برق وألمح "ساعده" ؟!
هو عذابك من بقايا قوم "عاد" ؟! = أو سلاله من عربنا البائده ؟!
الجفا نيران وسنيني رماد = ذرّ في وجه الأماني خامده
من طعن طفل المحبه في المهاد ؟! = شف جروحه في المحاني شاهده
من نهب بستان صدري للجراد ؟! = يوم خطواتي غدت متباعده
الفراق أقلام ودموعي مداد = من شرب دمعي وسيـّل جامده ؟!
من كسى هالروح بجروح ٍ جداد ؟! = عن جديد الجرح روحي زاهده
ذي ليالي الهجر سمحات القياد = وذي ليالي الوصل صعبه كايده
ازرعك بالحب وانتظر الحصاد = ليت تدري وش هو اللي حاصده !!
السهاد اللي غديت (إ)له السهاد =عقب سجنه في العيون الراصده
والتعب في ركب قلبي كالشداد = وذا هزيل العمر طوّح صامده
وذي بنات الشعر بثياب الحداد = صبـّروا قلبي عن اللي فاقده
آه لو تدري بصدري لك بلاد = ليه تتركها ورجلك شارده ؟!
داخلي حبك تناسل ثم زاد = كيف ينمو في العظام الهامده ؟!
الوفا والشوق بضلوعي عماد = والغلا لك والمحبه قاعده
ليت ودّي تسكن عيوني "رقاد" = واترك عيون "المفارق" راقده
وآتزود من نظر عينك بزاد = ما تشوف إن المسافه واجده
يا بياض ٍ خالطه طعم السواد !! = ودّ روحي في بياضه قاعده
لو ليالينا إلى يوم التناد = قيست بليله معك ، هي زايده
جفوتك موتي ووصلك لي معاد = مبعثي بدنياي قبل العايده
من عموم القرب مسلوب المراد = ومن خصوص البعد نجني الفايده
ما لا يخلو من رشاد ٍ به رشاد = وذي قلوب الغي تصبح راشده