مايبي ( مليون) ياسر أو ملايين ( الوليد) && رافع(ن) راسه وشايل فوق متنه (أ)كفنه

[يحيى ال بالحارث]

اهداء متواضع الى سلطنة عمان الشقيقه قيادة وشعبا واشكرهم على الكرم وحفاوة الاستقبال في الامسية الاخيرة بمسقط بمعية اخوي الغالي فهد نهار واخوي الغالي محمد ال مهيد واخوي سالم السيفي واخوي صالح السنيدي وعرف الامسية طاهرالعميري واشكر من قدم لي الدعوة الاخ الغالي الشاعر / سالم السيفي ومخرج ومنتج الامسية الشاعر عبدالله البطاشي والاخ الشاعر خميس السلطي على التغطية الاعلاميه واخوي خالد الداوود على الحضور والاخ خلفان الثاني والعزيز خميس الوشاحي وبقية الزملاء الشعراء وادارة المستشفى السلطاني ممثلة في مدير ادارة الخدمات العامه الاستاذ/ خليل الخروصي

كان ما فيها كلافه يا (محمد بن مهيد)=أكّد الحجز نتخاوى لي مطار( السلطنه)
جاتني دعوة كريمة وانت عارفني عنيد=ما أحب الا مخاوى من يشرّف معدنه
وانت ياخوي افتخر بك من قريب ومن بعيد= خوّتك ماهي بخوّة يوم أو شهر أو سنه
الأكيد ( الإيرباص) مسفّطه واخذ الاكيد=شغّلوها واعلنوا كلا(ن) حزامه يحضنه
واكتبوا بالنص في شاشاتها (حظا سعيد)= للي مسافر وللي جا يزاور مسكنه
والصّراحه يا محمد ان هذا اليوم عيد=يوم شفت السلطنه دار القبب والمئذنه
ما أحس اني غريب ونازل بمنزل جديد=أحسب ان نفسي مواطن جا يزاور موطنه
الكرم والجود والخوّه وترحيب(ن) شديد= أشهد انكم وافيين الساس ذربين ألسنه
حضرة/( السلطان قابوس المعظّم بن سعيد)=وين دارك سيدي؟ يافخر كل الأزمنه
ليتني أحظى بشوفك سيدي مره واعيد= شوفتك مره ومره والغلا أبرهنه
إن كتبت اجزل قصيدة فيك قالت ما أريد= عدّل البيت الفلاني والفلاني أدفنه
خايفه ما تكبر بعينك لأنك للقصيد= منبع وانا ضعيّف كيف اقدر أتقنه
سيدي أرجوك تقبل أغنية عبدالمجيد= والا اقول/ والله انك فوق كل الدندنه
سيدي أرجوك تقبل دم يجري بالوريد= دم شاعر مقصده من مدحكم صح بدنه
ما يبي مليون (ياسر) أو ملايين ( الوليد)= رافع(ن) راسه وشايل فوق متنه (أ) كفنه
من سلايل يام أصله حارثي والراس حيد= فالملاقى حب راسه مالقوا من يطحنه
كيف لا دامه سعودي نار عزّه ما تبيد= دام( ابو متعب) أخو نوره مليكه مزبنه
شاعر(ن) لا جا لزوم القاف (أ)لنظمه يجيد=ماهو من اللي يجيب المسطره ثم يوزنه
وكان مافيها كلافه( يامحمد بن مهيد)=وقّف نصفّق انا ويّاك لاهل (السلطنه)

ملاحظة : أسم سيدي صاحب السمو الملكي الأمير / الوليد بن طلال ذكر بالقصيدة لارتباط اسم سموه الكريم بالملايين بين عامة الناس ( ألله يزيدة) ليس إلا