مقياس ريختر

[عبد الرزاق الدرباس]

مقـياس ريخـتر / الشاعر : عبد الرّزاق الدّرباس

لو حبّـك بقـلبي تعادلـهْ أثقـالْ = كانتْ جبالْ الصخر منّـه حصاتي
أعرفْ تبعّـدكْ أسـوارْ و اهوالْ = بسْ اتريّا المطرْ من برقْ غِيـماتي
من يومْ شفتكْ عالمي صارْ زلزالْ = لا (ريختر) و غيـرهْ يقيسْ درجاتي
يا زينْ اسمكْ حين ينكتبْ و ينقالْ = أحلى نغـمْ يعزفـهْ بوح الشـفاتي
ألعي على همستِكْ و الدّمعْ همّـالْ = حتّـى عـدوّي رثى حـرّة شِكاتي
ودّي انصبكْ في ساحة الرّوحْ تمثالْ = و أهديكْ نبضي بعد حبري و دُواتي
و اتجّهْ صوبكْ لا يمين ٍ و لا شمالْ = و اعتـذرُ منّكْ حين تحكـمْ صَلاتي
حيـث ٍ لبيـت الله تنشَـدّ الحبـالْ = و ادعِي جهـةْ قبلتكْ تنسابْ خطواتي
لو خطوتكْ يا لغلا تمرّ بكثيبْ رمالْ = كانْ اسـتوى شـهدٍ و سـكّرْ نباتي
ماني بيائسْ كيف ما دارتْ الحـالْ = عنـدي أملْ باكـرْ بتزهـرْ فـلاتي
و احبسكْ بضلوعي تباشـير وآمالْ = و اروي ظمايْ بعذبْ ماكـي الفراتي
كان الوطرْ وصلكْ و للحِينْ مازالْ = يجري بعروقي نبضْ ويعيشْ في ذاتي

*** تمّـت ***
الشارقة 23/2/2011م