[عبد العزيز الجرّاح]

القصيدة الأصلية للشاعر السامي / تركي النامي

الله يديمك يالمطر كل الأعوام=ويديم مزنٍ جابك وجابني له
لامن برق حرف الفرح حقق أحلام=ولامن رعد حرف الحزن هد حيله
جيتك وانا من لفحة القيض منضام=نفسي لـ ( ندف-1) الثلج شفقا عليله
(شاعر بغربه- 2) رجعته تعني إعدام=إما يموت القلب وإلا رحيله
شاف فـ (مرايا اليأس- 3 ) أشباه الايتام=و( الصمت يجتث المدائن - 4) مسيله
(مالوم قلبك-5) والوفي كيف ينلام= إلا بحكم اللي تنكر خليله
لا يالغصن لايكسرك حظ ماقام=ولا ( ياحمامه-6) للغصن من يشيله
لو ( أجمل الاقدار-7) في كل الايام=محدٍ نثر دمعه ويده شليله
ولو (8-هو جرح نفسه بنفسه) بالاوهام=لا ما زبن قلبه قوافي دخيله
ولحدٍ غدى وجهه من الحزن مدهام=من سيرة المغزل وفرحة قتيله
ليله سرى من ضجة الشوق مانام=(حلم وبقية صوت- 9) يدعي يجي له
يعيش (حالة حب- 10 ) ويصـارع آلام =الله يعيـن الـحـال والله وكيـلـه
(حبٍ قديم-11) ونوّخ إركابه حيام=و (ديم الشموخ-12) اللي مفارق لجيله
و(13-دم الحزن) ينزف ونزفه من العام=وان غاب نزفه حلله يا زميله
(14-تجولت في الدنيا) محطات وإعلام=وانت الثمينه لوكشفت الحصيله
هذا شعوري للمطر ود وهيام= قيّد يديه الوقت ماهي بخيله
من دون نقصانٍ بصفحات واقلام=كل الحروف المبدعه تنتمي له

1- ندف .. للكاتبة / ميقات
2 - شاعر بغربه .. للشاعر / عبد العزيز الجرّاح
3 - مرايا اليآس .. للشاعر / محمد الفيفي
4 - الصمت يجتث المدائن .. للكاتبة / إيمان بنت عبد الله
5 - مالوم قلبك .. للشاعر / برهان المناصير
6 - ياحمامه .. للشاعرة / ينابيع السبيعي
7 - أجمل الأقدار .. للكاتبة / صبا خالد
8 - هو جرح نفسه بنفسه .. للشاعر / أحمد حياء
9 - حلم وبقية صوت .. للكاتبة / ليلى العيسى
10 - حالة حب .. للكاتبة / عبير محمد الحمد
11 - حبٍ قديم .. للشاعرة / ابتسام آل سليمان
12 - ديم الشموخ .. للشاعرة / شموخ بنت خالد رحمها الله
13 - دم الحزن .. للشاعرة / هواجس الذبياني
14 - تجولت في الدنيا .. للشاعر / عبد الخالق الزهراني