[برهان المناصير]

جا خريف الجفا وجتني تصاويب
وش بعد بك فصول كلك عجايب



الشتا بك شقا سقاني تعاذيب
لين خلّا زروع قلبي خرايب



وفي ربيعك وهم يسوق التراطيب
كم زرع بي زهور وراحت ذهايب


وجا فؤادي بفصل شوقك لواهيب
تحرق اللي نوى يحبك وطايب


كم كتبت الغلا وجتك المكاتيب
من فؤادي حروف سوّت كتايب


من تجيلك تبعثرت بك تراحيب
ما تلاقي بوسط قلبك رحايب


لي حروفي تعيش دنيا تغاريب
وفي خفوقك تودرت بالنصايب


بك تعلمت كيف ارسم مواجيب
وبك تعلمت كيف نوح الندايب


لو تجرّع مرار حبك عوى الذيب
وناح زرعن يظن صدك سحايب

على بحر خفيف الشمس