حياتنا ماهي مثل زي ماتشوف .................تضحك ولامن جيت منها بكينا تفتح لنا دربٍ وتزرع به جروف .................تبني لنا وإن غبت تبني علينا نلقى بها بيتٍ وتسكن به الخوف .....................ماتستلذ النوم لو ماجلينا اشباحها تلفي على هيئة ظروف .....................كل مافتحنا ظرف ظرفٍ لقينا منها ضلوع الصدر تلعب على دفوف ......................تسمر عزى للقلب ليلة شقينا وكل مالقن بي لحن جابت لهن اوف .......................غصبٍ تجيبة حزن ماهو بيدينا نلبس جليد الروح ثوبٍ من الصوف ......................يمكن تذوب ثلوج صيفٍ وطينا وقامت تشتــّي بس في داخل الجوف .......................ماقصدها ياكود خافت دفينا حتى غدير الحلم تاقف به وقــوف .......................تبي تـكدّر صـفو ميّه بطيـنا عجزت ابلقى درب مابه لي حتوف ........................حتى الْدروب اللي نبي ماتبينا يابنت أنا هالوقت عندي له وصوف: .........................همٍ..وغم..وكل مابه حزينا ولاتسأليني كيف حزني على نوف .......................نوف بلغت بالحزن حـد الونيـنا عجز الدهر يجمع بنا جملة حروف ......................متشــكّلة من كل شئٍ حســينا مضــّـت معي ساعة وانا طفل ملقوف .......................وشوفي بنات اليوم جابن سنينا مرّن وانا مابين عايف..ومعيوف .....................متعلّقٍ مابـين شــك..ويـقـيـنا ولاتطلبي تفسير غامض ومعروف ........................خلّي بقلبي بعض همّي دفينا حياتنا..تنظر لنا.. بس مـااتشــوف .......................تبكي ولامن جيت تضحك علينا