هاض الخيال اللي بالابداع مرهون= نادى بنات الفكر لين اسمعت له
درّج ركاب الشعر تمشي على الهون= تسبر جناح الليل يوم اطربت له
يترجمه حسٍ له البوح مكنون= أحلى مواويل القصايد عنت له
من واقعه سطّر قوافيه بفنون= يشرح معاناته حالٍ جرت له
من هاجسٍ دوّت معانيه بلحون= عبّر بها يوم الليالي صفت له
تمركزت في خافقٍ كله اشجون= على شواطي الفكر حتى بنت له
حطّت معالمها على شي مصيون = واستنتجت بعض الرموز و وعت له
هوّن على نفسك ولا تجاري الكون= لا تخدعك ناسٍ تقول وصغت له
ما تنفع الاقوال مهما يقولون= يامكثر اللي بالمخاطر حكت له
لكن حقيقتهم على الدون بالدون= تبعثروا واقوالهم وهقت له
من يتبع الغاوي بلا شك مجنون= واهل العقول الفارغة مهدت له
يا زلة اللي يبذل الجهد مغبون= دام النفوس اللي تحب انكرت له
والرزق عند مكوّن الكون مضمون= ياتيك لو نفس الفتى ما سعت له