[أميرة الجابري]

يوم المشاعر واقفة وأرضها بور= وأحلامنا خلف الشبابيك تنهار
وش لي بصبحٍ ما يصحي لي النور = وش لي بنبعٍ ما أرتوت فيه الأقطار.!!
لو فز لي قلبٍ من الصوت مبهور = واستقبلتني عين من لفتة أنظار
وش بستفيد أن كان لي قلب مذعور = يرحل مع أحساسه وهو خلف الأسوار
ياصاحبي ليه الوصل مات مقهور = ليه المشاعر قبل توصلك تحتار
حتى الخفوق اللي على البعد مجبور = وش حيلته.؟ ياحيلة الله بـ الأقدار
ركب الهوى مر ونثر دربي زهور = سلم علّي وجاب لي منك تذكار
يعني ملكتك في الهوى شعر وشعور.!! = يعني بدت صوبي توديك الأفكار.!!
صحيح أنا ذربه ولا فيني قصور = صعبه وأعاند هالزمن كيف ما صار
لكن بجوفي قلب ما يسمع الشور = لا جيت أبجفا الناس عيّا ولا سار..!!
خل القوافي بس لا جتك طابور = تنثر مع عطر الحكي .. ورد وأزهار
وإلا المشاعر لو سقيت أرضها البور = أبقى مثل طيرٍ على غصنها وطار
أبملكك .. شعر ومشاعر وجمهور = ولا صرت لي جمهور أبشر بـ الأشعار