فقيرة ٌ لـ ثراءِ أعينكم ..!
وش كسبتي مْن الغياب وويش أنا قلبي كسب ..؟=غير تابوت لْجروح ؛ وصرختين ٍ مُعلنة ..!
ارجعي - كلي فديتك - لا تخافي مْن العتب=شوفتك تلغي مسافات الزمان المحزنة
من يلوم الجاهل اللي صام فرضه في رجب..؟=ومن يلوم العاشق اللي صام عن حبك سنة ..؟
ومن يقول انّ الغياب جروح ما تورّث أدب ..؟=كيف وماجد صار شاعر من غيابٍ يطعنه ..!
وانتي اللي تطلبيني : هات لي شي ٍ صعب=أو سؤال احتار لاجله في قصيدٍ توزنه
هاك هذا هو سؤالي ؛ وشوف من فينا غلب=والصعب ياللي تريده جبت لك من ألينه
ليه اذا غنى عديم السمع : يتمايل طرب ..؟=وليه ما للنار صوت بْرغم تملك ألسنة ..؟
فوق هذا وش تبين ..؟ الآن يتلبي الطلب=عمري اللي - لا قدرت - لرمش عينك أرهنه
إيه أنا وربي أحبك ؛ واعشقك حتى التعب=وانطق الآه لعيونك لو تبيها دندنة
أعشقك من عادني طفل ٍ ويرسم له شنب=ومَيّل عقاله بيوم العيد ؛ حبّك جننه ..!
نظرتك فيها اختصار لمن جهل معنى العجب=ظرف ثالث في عيونك للزمن والأمكنة
وقفتك تمثال عاج يزيّنه عقد الذهب=فكرة انك كليوباترا ؛ صدق فكرة مُمكنة ..!
غارت الشمس لجمالك واختفت خلف السحب=لبى من في الأرض يمشي ؛ والثريا مَسْكَنَه ..!
والعطر لا جيت جنبه : مال حتى ينسكب=ليه لا ..؟ وانتي العطور لشمّ عطرك مدمنة
خصرك اللي تنثني به كنّ عُوده من قصب=تشخص الأبصار لاجلك ؛ كنها بك موقنة
شفـّـتك توت وشهدها كنّه عصارة عنب=حظ من هو يشتهيها : حسرةٍ به توهنه
وهائك بْآخر كلامك داخلي تثير الشغب=لا مزحت وقلت [ إنتي ] ؛ قلتي والله مو [ أنَهْ ] ..!
بينك وبين الجمال اجيال يجمعها نسب=وانتي القمة لأنك : أصل فيه ومعدنه
كنّ هذي الأرض دونك وصفها كلمة : نُدَب=لو لا أمر الله لآدم هالبشر ما تسكنه
دون صوتك : ضجّ صمت ؛ وزاد في قلبي رعب=آآه يا ويلك من الله كيف قلبي تحزنه ..؟
تَبّ قامُوسُ التبَاعُد إنْ نَوَيْتِـينِي ؛ وَتَبّ :=كُلّ مَعْشُوق ٍ نَوَى بُعْدَاً ؛ وَقسْرَاً دَوّنَهْ
لا طرى فْبالي [ غيابك ] فزّ بي مارد غضب=حتى لا مني ذكرته ؛ قلت : ربي يلعنه ..!
.. ماجد عبد الرحمن ..