البست شعري غتره وبشت وعقال=وخليت تغريب المذاهب لغيري
في ساحتي للفكر مليون مدهـال=وبحري بمكنوز المعَرفـه غزيـري
مافي عروقي غير الإسلام مثقـال=أموت واحيا بـه قليـل وْكثيـري
اعتـزّ بالاسـلام والعـمّ والخـال=وعلى العروبه والاصالـه أغيـري
آباءنا واجدادنـا ذبّـوا الجـال=والّلي يبي درب المراجل يسيـري
موروثنـا مجـدٍ وفخـرٍ ومنهـال=نبني عليـه ونستحـث المسيـري
ماني بمفتونٍ بصرعات الاجيـال=مع كـل صيـاحٍ نهـبّ ونطيـرِي
لي رايٍ امشي به ولي عزم رجّال=ولي لابـةٍ إذا بغيـت استشيـري
آل السعود الّلي لهم كل ماطـال=ماينزلـون إلا الطويـل العسيـري
آل السعود مطّوعـة كـل عيّـال=مايضربـون إلا بسيـفٍ شطـيـري
آل السّعود الّلي لهم فيْ وظـلال=وان شدّت الاّيـام غيـمٍ مطيـري
للأمير الشاعر / خالد الفيصل