بعد ما دار عقرب ساعتي واشّر للجنوب = وناح الفرخ في عشه ولا له والدٍ ينصاه
تذكر قلبي المنسي تناسي خلي الرعبوب = ونوّى القلب بالشده لدارٍ ظنتي سكناه
واعذل القلب بالعزة وطاريها علي ينوب = واعزّم بالرحيل ويعذل القلب الشوير لقاه
عجزت القى على المقدور حل ولا خذاني صوب = مرابيع الديار اللي تعلل جرحي وتجلاه
حزين ، بداخلي طفلٍ من اقرانه ضعيف اسلوب = ترد الكلمة بجوفه وتنطق حالته ويلاه
رعى الله ايام لقيانا على هروب العصر بغروب = رعى الله كبر وقفاته على حد الجفا لا جاه
على شانه رخصت قلوب وبعده ما شريت قلوب = يكفّيني الا منه يليّن مسمعه لـلآه
بوسط العين دمعاتي على الذكرى من المكتوب = كتبت الشعر باسبابك وتفسيره الى معناه
ولكن الجفا سيفٍ وحد السيف عـ المحبوب = والا منه غدى الجافي حبيبٍ فالصدر مرباه
وانا بقول يا قلبي كسير ولا عرفت تتوب = عزاك ان العرب تقرا وتدري بك عقب فرقاه