|
ظلام المخاليق
( 11 ) بعض البشر ينسيك ظلم المخاليق .......... واليا لمحك بضيق كان المواسي يسري عليك يحن يومنه الضيق ............... يملا حياته بالشقا والمآسي يسقيك عذب الما وهو يابس الريق ...... ثابت ثبات الشامخات الرواسي والله ياظل الحانيات المواريق .......... جيتي وقيظ الشمس يحكي براسي جيتي كتبتي بالحشا والمعاليق .......... بالكون بعده مركب الخير راسي الطيب طبٍ للجروح المفاتيق ....... .... اللي أثرها بالظهر ما يقاسي جاني قمر خفف ظلام المخاليق ......... يجزاه ربي خير ذاك المواسي برهان المناصير |
الجرح الأول
(12) جرح غدرك يا حبيبي ما يطيب ........... في فؤادي طعنته مثل الرماح ما يفيده يوم فرقاك الطبيب .............من يجسّه قال خلاني وراح يلتهب لا زار طيفك يا حبيب ..... من عقب فرقاك ما يوم استراح كم تحراك الفؤاد وما تغيب ......... عن خياله يوم يا سيد الملاح كم سهر ينطر يشوفك من قريب ....... يا عساك تمر مع نور الصباح من يناديك المولع ما تجيب ..... ومن عيونه تختفي خلف الوشاح قلت يا قلبي ترى أمرك عجيب ............ما هقيته يوم يرجع للمراح يا حبيبي خبر القلب الصويب ........وش نهاية طير مكسور الجناح وش نهاية بخت دومٍ بك يخيب .........لي ضحك يومن وتاليها نواح قلبي المجروح أمسى بك عطيب ........ما هقيته يوم يهديك السماح برهان المناصير |
الفراق
(13) ألا يومٍ نويت الهجر جاني ...........حروقٍ بالحشا زادن لهيبه غيابك نار تلظى في جناني ..........ترى قلبي شفوقٍ لا تذيبه ألا من لي بطيرٍ لا شجاني ........نحيبه زادنا شوقٍ نحيبه يغرد ثم يهاجر كن عداني ......بنوحه زادني فوق المصيبة أريد الطير يرجع والزماني .....أريد الطفل يرجع من مشيبه فراق الصاحب الوافي شقاني ....... ألا يا رحمة اللي لي يجيبه ألا يا ربّ ترحم من يعاني .......غريب بديرته روحه صويبة رحيم و رحمتك فوق المعاني ........إلى من يطلبك عاني تجيبه ترد الما سحايب ما تواني ........ويحيي زرعنا وبلِ يصيبه برهان المناصير |
سحائب الحزم
(14) هم هل السنه سحاب أمطر صبايب ..............واليمن فزت توضت من وريده ما بقى فيها من الحوثي شوايب ..........سلسبيل اتشف عن أصفى عقيده مات كسرى من بغى دولته خايب ..............النبي قد قال ماله من جديده لا غدت إيران تنفخ بالمصايب ..............لمّا لمّ الشمل منهم نستفيده السعوديه والاردن والحبايب ..............من قطرها والامارات الرشيده هم أسود السنة في عزم وكتايب ...........لا خست إيران تدرك ما تكيده يا هل التوحيد يا حزم وسحايب .............الله أكبر واليمن تبقى سعيده برهان المناصير |
بوح_الحفيف
( 15 ) البشر وقت الظما مثل السراب .........لا ظميت اقطع رجا القلب العفيف الطمع خلّيه في منشي السحاب ...............ربك اللي لو يشا برٍّ لطيف من يحن الغيث يحْضنه التراب ............تتولد زهره على رغم الخريف بعد عسر اليسر يصرخ بالجواب ............لا وعاه القلب تسمع له رفيف ايه هالدنيا غدت غابٍ وغاب ............الأمان وياكل الصلف الضعيف ليتني عصفور يا عصر الذياب ...........لا لمح ناسٍ حضن غصنٍ رهيف باح حزنه في صفيره والغياب ..........وراح يسمع بالورق بوح الحفيف هذي الدنيا بشر!! ذبح وعذاب ..............من يبي يبحر تغشّاه النزيف هذا أنا صديت واعلنت الغياب ........وش بقى يالعالم الشْرس المخيف برهان المناصير |
روح النقا
( 16) جاك يا روح النقا يا ملجا للطير الصويب .....................قلبي رفرف واحتضن شبّاك بيتك واتقا لا لمسه الحال يزهر واكتسى لون الحبيب ...................كن تلحّف غيم وإلّا كان والثلج اصدقا اسبل الشباك جفنه من سمع بوح الغريب ...................والندى لاجله تحدر خالط دموع الشقا جاك مجروح المشاعر واعجز الجرح الطبيب ................من لمح نورك وفارق غصن صدري وارتقا لا غدا الشبّاك عالم ياسع الكون الرحيب ...................من يلوم القلب ودّه فيه عمره لو بقى اختلط صوت المحبه مع صدى صوت النحيب .................والقلب ودّه وريده لاجل يطرب يفهقا ايه ظامي ودّيَ اشرب من معين القلب طيب ..................ارتويتك بالخيال وجفت حقوق اللقا وجهك البدر البعيد وروحك النور القريب ...........كم شربك الحلم شافك في غدير الما نقا برهان المناصير |
رويتك خيال ظميتك لقا
( 17) أعيشك فضا به تنفس نقا ..............خيالي سمايا وطيفك قمر رويتك خيالٍ ظميتك لقا ...........علقتك سرابٍ عشقتك بحر ظميتك وطيفك بقلبي بقى ..........بصمت السحابه وبوح المطر ملامح حبيبه يباس وشقا .............سقاها حنينٍ وسالت نهر يهز الأماني ليا من سقى ...............تفتح بقلبي تبسم زهر وفاحت مشاعر تبي وتهقا ...........نسايم قصيدي تشيل الخبر تعيشك خيالٍ تحبك نقا ........وتبقى افـ سماها الهنا والقمر برهان المناصير |
دوح الروح
(18) حزينٍ لاذ باطراف المدينه .....................يدوّر بالخلا روحٍ فقدها جناحه ينزف وهزه حنينه ..............وروحه تطلب الدوح وسعدها أنا مثله غدت روحي سجينه ..............تبي لو طارت وخلّت جسدها تدوّر عالمٍ ما به ضغينه ................وفيه الناس ما ناسٍ جهدها ينابيع السعاده والسكينه ...............بساتينٍ تواسي من شهدها ورود اشكال والوانٍ.. وزينه ............نسايم طيب يطرب من وجدها كما نحله تصافح ياسمينه ...................تتوه وتثمل بلذة شهدها تبي عالم تعطّر ساكنينه ............بمسك الروح إلى فاح برشدها تبي والريح جت عكس السفينه ................وتطعم للصخر باقي وعدها لفاني الحلم وازعجني أنينه ...............شقي شايل من الدنيا نكدها رجع مجروح ينزف من وتينه ................سقى حزنٍ نبت فيني بعدها نزف والموت جا بيني وبينه ................وخلّا الروح بي تنشد وحدها تغرد قصة الدنيا الحزينه ....................لحدها غصةٍ تنهي مهدها أنا يا طير مثلك بالمدينه .................حزين الروح ملّت من نكدها برهان المناصير |
(19)
تمل لا ثمل قلبك سكب حنظل همومك ................وحنا انتذوق من حلا البر نحتاجه غريب المرض يا بوي وسع لك هدومك .................فديتك فداك القلب والصدر وسياجه اشوفك طويل الصمت ما تعلم علومك .......................وقلبك تسولف للملا بحة خلاجه فقدنا المطر اليا عزف لهفة قدومك .................فقدنا بحر فطنتك حكمتك وامواجه تجي سيرة الماضي نسايم حيا تلومك ...................تتابع على قلب الضيا هزّت سراجه تفوح بزهر سيرتك من روضة سلومك ..............تجي ضحكة إنسانٍ بعد عقدة حجاجه سكت وسكتنا وامتلت سلة غمومك ............وسجنت القصيد اللي دنت لحظة فراجه على بابك الذكرى اوقفت تسكب علومك .................وقصيد اسكبتني بالوفا عند مزلاجه برهان المناصير |
(20 )
الطفل الغريق أيها الطفل عذرا فهذا ما نملك . وسع ذاك البحر زاد الصدر ضيق ...........وش يفيد الحبر وقت المعمعه أمس نبكي قصة الطفل الحريق ...............وانتهى موسم مدامعنا معه وش بقى يا دمعنا لجل الغريق .............من يرطب هالقلوب الموجعه لي متى والعار والهم العتيق ..................ساكنٍ فينا ولا من يدفعه شفت دمع البحر ع المجد العريق ..........واختلط ملح الأسى مع مدمعه بلل اللي بالبراءة له بريق ............وانتحب يوم العرب مستمتعه من حظنه الطفل واستل الشهيق .................جفت الريق التي ما تنفعه ليت هالنايم على شطه يفيق ..............يحظن أمه والألم ما يفجعه يروي للعالم تفاصيل الغريق ................اللي كله في غيابه صدعه برهان المناصير |
| الساعة الآن 08:33 PM. |
Powered by vBulletin® Version 3.8.8 Beta 1
Copyright ©2000 - 2024, Jelsoft Enterprises Ltd.
3y vBSmart
جميع الحقوق محفوظة لـ منتديات إملاءات المطر الأدبية - الآراء المطروحة في المنتدى تمثل وجهة نظر أصحابها