قالت: ادعي لي يجوز الله .. يوسعها عليّه = ضيقةٍ ضاقت وربي .. من سبايبها المدينه
ضيقةٍ حطت بقلبي .. ألف جرح .. وألف كيّه = لين صدري لدلهم الليل .. بكّاني ونينه
قلت: يا كيف اتضايق .. بنت مثلك شاعريّه =ناعمه ، عذبه ، رقيقه .. مثل ورد "الياسمينه"
والسهد ياكيف يسكن .. في عيونٍ نرجسيّه = والشقا يا كيف طالك .. لين صرتي له رهينه
يوم صارت تشتكي لي .. قلت: يارب البريّه = هوّن الكربه عليها .. لين تحضنها السكينه
جادلٍ تكتب حروفٍ .. راقيه ، عذبـه ، نديّه = ما قريت إلا الثمينه .. وانتظر منها الثمينه
بنت بدروب المحبه .. مالها روحـه وجيّه = قلبها بأول دروبـه .. ما خذا احدٍ حنينه
ليه يا كل العذوبه .. مشقية روحٍ نقيّه= بنت مثلك مو حرام .. تعيش دنياها حزينه
والله أني من سبب ضيقتك .. والهم وخويّه= صرت أشوف الهم يبرالي .. وجوّدني يمينه
روحي الله يسعد أيامك .. ويجعلها هنيّه=وتصبح آمالك حقيقه .. حلمك اللي تحلمينه