خذ عيوني من جفوني لك سحابه = واطلب ف دمعي وبسرف في انصبابه
ضاقت وساع الفجوج أمام عيني = من بعد ماكان تكسيها الرحابه
واستهاض الشعر فيني ماطلبته = لي ثلاث شهور مالي في الكتابه
نعنبوها طعنة الفرقا صعيبه = تجعل الرجّال يهذي من عذابه
شوفني معها بعد مارحت عني = وخالقي عايش كآبه في كآبه
لو حدود الله خيارات لعباده = مابغيت من الحدود إلا الحرابه
استغفر الله ..هذا صدك كيف سوّى = كني عايش كل عمري في ضبابه
كل ماجيت ابطلع اثري ابدأ = لين راح العمر كله في خرابه
يآخي ارفق لاتبالغ في طعونك = يآخي استح كثرة الصده عيابه
شف طعونك كيف تنحت من ضلوعي = لانفع فيها طبيب ولا طبابه
وانت ماهمك ولافكرت فيني = كن مالك ذنب تسرف في ارتكابه
كان قصدك ذلتي لا ياحبيبي = كان منت بذيب خاف من الذيابه
أما تضبط وضعك وترجع لرشدك = ولاّ لا تطمع نجي لك بالذرابه
عزتي هي رأس مالي وإن تلاشت = قل لي كيف القى مع العالم مهابه
عشت طول العمر اتحرّى وصولك = ومالقيت من الوصال إلا غيابه
راح ليلي بين تفكيري ببعدك = وبين ونّاتي وجرّات الربابه
وبين نظرات الجفون المستهيمه = وبين خفّاقي وضيقه واضطرابه
وبين سجاده .. وقرآن ..ووساده = كان فيه إنسان عايش بإغترابه
يزفر الدنيا .. ويشهقها .. ويزفر = ويغسل احقاده قبل يغسل ثيابه
يستر جروحه عن العالم ويسكت = والصبر هو والرضا صافي زهابه
كان وده بكلمة(ن) من قبل يرحل = وقبل لا يعلن عن العالم ذهابه
كان تبغي تريح دماغك وتهنى = شيل من قاموسك الفكري ( غرابه )