إملاءات المطر - قصيدة "جاني طيفك " بالعامية المصرية

(جاني طيفك )

صديقي تعرفت عليه في أحلك سنوات العمر لم يكن يحلم بأكثر من أن يرى النور يداعب العصفور ولم يذهب خياله أبدا إلى مشارف القصور حتى إذا ازينت له الدنيا أودته صريعا في حادث ففقد الحركة ولازم السرير حتى إشعار آخر من القدر المحتوم.......إلى عادل عليوه
جاني طيفك جنب مني
دار كلامْ
همس مره وكلمه مره
وحضن دافي في المنامْ
لما تتقابل عيوني
وف عيونك يا اخي
رمش بيرد السلامْ
ضحكة القلب اللي ساكن
بين ضلوعك من زمان
بسمة العين اللي شافت
بين ربوع خوفك امان
لمسة الايد اللى شالت
والانامل لما كانت
تكتب الصبر اللي كان
..........
جاني طيفك جنب مني
وبحر من شوقك دموع
كلمه مني ونظره منك
بين سواد ليلك شموع
والمراكب تمشي بينا
والامل بين الضلوع
انت ليه واقف مع الحلم اللي مات
انت ليه بتعد ايامك ساعات
انت اكبر
من دفاتر ذكريات
خلي طيرك
ينفض الجرح اللي فات
أنت لحظة شوق
وعدت فيها كل الذكريات
خلي قلبك
ينسى مره
كل حزن وهم فات
أنت بين قلبك وبيني
خد وهات
انت بين ليلك تملي
تكسر الضجر بثبات
مد رجلك فوق سريرك
دانت ما تهزك اهات
دانت عزمك من جبال
واسال الوادي يا عادل
والصحاري والتلال
لما كان صوتك
يغني " لا تقلها يا اخية
قد مضى عهد النضال"
لما كنت تمد باديك الحبال
مد رجلك فوق سريرك
يا بلال
دا الأمل ساكن ف عينك
وبسواد ليلك هلال
تسوى ايه الدنيا
لما حلمي اللي اتولد
اصبح محال
تسوى ايه يا وطن
لما ابقى في ترابك سجين
لما تسرق يا وطن
من غنوتي حلم السنين
لما طير الفجر فوق نيلك حزين
لما يتمايل نخيلك
وف سنينك مرتين
فين فرايحك يا وطن
خليني اصارحك كلمتين
فين مراكبك
لما تاهت بين دروب نيلك عنين

مره طيفك يا وطن
زارني ف منام
همس مره وكلمه مره
وحضن اكبر م الكلام
لما ضمتني بحنانك
قمت نستني الملام
همس مره كلمه مره
كل دا
وما عدش غيرك في المنام

أبو خلاد هشام فتحي