ما دريت الشوق واش طعمه و لـونه =ليـن فارقـته و بقي طيفـه معـاي
آه من سـحر الكحـل و لا فـنـونـه =امتلك جهـري بعد سـرّي و خفاي
صرت مغلـوب ٍ مع الحب وشـجونه =حـين ما حسّيت نبضـه في دمـاي
هـاج في قلـبي تباريحـه و ظـنـونـه =وأقسـمت بالله يسـكن في حشـــاي
حبـّه بروحي نخـل لو يزرعـونـه =تشــبع الدنيا و أهـلهـا من جـناي
نظـرتهْ تأسر جيوش اسكندرونه =تفجّــر الصخـر الأصم ّ بعـذب ماي
و صوته بسمعي يزلزني بمرونـه =و فيـه ذايب مثل سكّر وسط شاي
ما سـمعت أقـوال ناس ٍ يعـذلـونـه =ولا ســواه لـمحـتْ قـدّامي و وراي
سـاكن ٍ في الروح لا ، لا تطلعـونه =لــو يـغـادرهــا يـغـادرني هـناي
لو عيـوني شافـت الليـل بعـيـونــه =تنـتعش روحـي و يتحـقـق مناي
لـو أســـير عيـونـهـا با يطـلقـونـه =يرجــع لسـجنه مخيّــر و برضاي
تايـه ٍ فكـري و من غـيثي مـزونه =هـوّ عـوقي في الهـوى و بلسم شفاي
و اجب ٍ في الحب عـذري تقـبلـونـه=و واجـب ٍ غـفـران زلاتي و خـطـاي

الشارقة 22/1/2011م