آهٍ وآهٍ وآهٍ يــا وجــل حـالـي
.........................لا جيت يا عيد ما به من بعيـد لـه

لا جيت ياعيد مابك شي يحلا لي
.......................... إلا أن اسمي معك في دفتر الرحلة

فسمح لي إن أعتذر عن ثوبك الحالي
........................... ماحس ثوبك على مثلي بيلبق له

مثلي يعيّد بسالف ثوبه البالي
........................... لأحساسه بسالفٍ مازال يجنح له

أصبّ من دلّة الماضي بفنجالي
................... يسكب لي الحزن وان أشرب وسولف له

عن سالف بيننا مازال في بالي
.............................. يمرّ نسمة دفا وانا اتجغرف له

أشقى لمثله وأحسّه بعد يشقى لي
............................. أصبع لكف الحزن وانا له الدبلة

ماعدت يا عيد ذاك المشرق الحالـي
........................ وماعدت أنا اللي لبس ثوبه ووقف له

يـا عيـد عيّـد لحالـك لا تحرالـي
........................ أنا غريـبٍ همومـه فيـه محتفلـه

أنا غريب رماه الحـظ مـن عالـي
......................... على حصاة الأسى والبين هاتف لـه

لو عرّت الريح لك مطويّة آمالي
.......................... قريت زيف الرضا اللي كنت منتحله

من صرت يا عيد مفرح بك معا غالي
........................ لا تحتسب بي معك في مسرح الحفلة